Bakı ş.

Son günlər ölkəmizdə fəaliyyət göstərən bir sıra mətbu orqanlar, ADA Şirkətlər Qrupu haqqında həqiqətdən çox uzaq olan, dedi-qodu xarakterli yazılar dərc etməkdədirlər. Bu yazılar nəinki səsləndirlən fikirlər, hətda mətn baxımından belə eynidir. Aydın məsələdir ki, bu tip yazılar sifarişli yazılardır və ancaq bir məqsədə ADA Şirkətlər Qrupunun imicinə zərbə vurmağa xidmət edir. Təəssüf ki, bu yazını yazanlar şirkətin ölkənin iqtisadi və sosial həyatında, o cümlədən son illərdə yüksək sürətlə inkişaf edən gündəlik təlabat məhsullarının pərakəndəçiliyi sahəsindəki rolunu ya görmür ya da görmək istəmirlər.

Bir-neçə mağazanın bağlanmasını əsas tutanlar bunu böyük bir şirkətin bağlanması kimi təqdim edirlər. Halbuki, azad bazar iqtisadiyyatı şəraitində bu adi hal sayılmalıdır. Yəni zəif olan sahəni ləğv etməklə (bu halda mağazanı bağlamaq), işçi vahidlərinin ixtisarı və s. gələcəkdə yarana biləcək daha böyük maliyyə itkisinin qarşısını alır. Elə şirkətin biznes planında da, rentabelliyi aşağı olan mağazaların bağlanılması və ya köçürülməsi əvvəlcədən nəzərədə tutulmuşdur.
Yazılarda ( daha doğrusu yazıda) şirkətin holdinqlərə borcunun yaranması məsələsi də qabardılır. Heç kimə sirr deyil ki, 2008-ci ilin sonlarından etibarən dünyada baş vermiş maliyyə böhranı bir çox strukturları, o cümlədən maliyyə inistitutlarınıın müəyyən çətinliklərlə üzləşməsinə səbəb olmuşdur. Bu səbəbdən qısa müddətdə yeni kreditlərin cəlb olunmasında müəyyən problemlər yaranmışdır. Beynəlxalq pərakəndəçilik sahəsindən az-çox məlumatı olanlar yaxşı bilirlər ki, bu gün istər bu sahənin son illərdə geniş inkişaf etdiyi Rusiya Federasiyasında, Ukraynada istərsə də pərakəndəçiliyin beşiyi sayılan ABŞ və Avropada ticarət şəbəkələri nəğd vəsait problemi ilə üzləşmişlər. Aydın məsələdir ki, hələ dirçəliş mərhələsində olan, genişlənməkdə olan bir şəbəkənin bu tip problemlə üzləşməsi də təbiidir. Lakin bütün bunlara baxmayaraq, ADA Şirkətlər Qrupunun menecerləri əlavə vəsaitlərin cəlbi üçün uğurla nəticələnmiş addımlar atmışlar.
2010-cu il hələ yeni başlayıb. Elə dekabr ayının 18-də televiziyaların birində (“Xəzər” TV 18 dekabr 17:45-də) canlı yayımla “Almalıdan yeni il sovqatı” adlı tirajlı lotereyanın oyun mərasimi olub ki, burada 20-yədək alıcı dəyərli hədiyyələr qazanıb. Yeni marketinq aksiyalarına gəlincə isə, narahat olmağa səbəb yoxdur. “Almalı” öz dəst- xəttinə sadiq qalaraq, alıcılarını sevindirməkdə davam edəcəkdir.

Sonda ADA Şirkətlər Qrupu haqqında bir neçə fikri açıqlamaqda fayda görürük. ADA Şirkətlər Qrupu 2005-ci ildə yaranıb. Qrupun əsas səhmdarlarından biri Beynəlxalq Maliyyə Korporasiyasıdır (IFC). Layihə ölkənin qeyri-neft sektorunda IFC-nin ən böyük maliyyə layihəsidir. Layihənin məqsədi ölkədə aparılan regionların inkişafı proqramına dəstək olmaq, yerli fermerlər üçün böyük həcmli alıcı formalaşdıraraq onlara stimul vermək, beləliklə aqrar sənayenin inkişafına nail olmaqdır. Fəaliyyət göstərdiyi qısa müddət ərzində şirkət şəffaflıq, müasir korporativ idarəetmə və pərakəndəşilik texnologiyalarının tətbiqi baxımından bir çox xarici KİV-in diqqət mərkəzində olmuşdur.
ADA Şirkətlər Qrupu öz partnyorlarının və almalımarketlərin alıcılaırının nəzərinə çatdırır ki, bu tip yazılardan narahatlıq keçirməsinlər. ADA Şirkətlər Qrupu, ölkənin ərzaq sektorunda monopolist olmaq iddiasında olan, qeyri-şəffaf təşkilati-hüquqi-maliyyə strukturlarına malik şirkətlərdən fərqli olaraq, öz fəaliyyətini ölkədə biznes mühiti üçün yaradılmış əlverişli şəraitdən faydalanaraq, daha da genişləndirmək əzmindədir.